Dugang nga 32 ka mga barangay electricians ang misalmot sa gipahigayon nga pangtulo nga accreditation sa mga electricians karong adlawa, Pebrero 5.
Ang maong kalihokan gitambongan ni General Manager Gerardo Oledan, Board President Salvacion Jornales, ISD Manager Allan Joseph Borrinaga, ug MDO Evelyn D. Olimba nga naghisgot sa polisiya labot na ang katuyuan sa maong programa. Gi-eksplikar ni ISDM Borrinaga ang mahitungod sa ilang responsibilidad isip usa ka partner sa BILECO nga ang tumong mao ang paghatag og mas maayong serbisyo sa mga miyembro-konsumedor ilabi na kadtong mangapply palang og bag-ong connection.
Si GM Oledan sa iyang bahin, nagpasabot sa mga oportunidad sa mga mamahimong accredited electrician hilabi na ang umaabot nga mga proyektong may kalabutan sa pagpasuga.
Kabahin sa maong accreditation ang orientation nga gipangunahan nila Engr. John M. Mocorro, Engr. Eldrich Sacare, Engr. Lucresio Vidal, Engr. Roque Macorol, ug Inspector Ruel De Leon. Lakip sa ilang gihisgutan ang sakto nga pag-instalar sa kuryente, pati na sad ang bahin sa metro, transformer, service drop wire, ug mga sukod niini.
Gihisgutan usab ang electrical safety nga mao’y pinaka-importante nga kanunay hinumduman sa mga electricians. Naninguha sila nga makakat-on sa mga gipang-hisgutan tungod kay mao man ang lakip sa ilang gibuhat nga written exam ug gisundan sa practical exam kun diin gisulayan ang ilang kahanas sa pagpanaod og metro.
